hamari baat unhen itni nagawar lagi
gulon ki baat chhidi aur un ko khar lagi

bahut sambhaal ke hum ne rakhe the panw magar
jahan the zakhm wahin chot bar-bar lagi

qadam qadam pe hidayat mili safar mein hamein
qadam qadam pe hamein zindagi udhaar lagi

nahin thi qadr kabhi meri hasraton ki use
ye aur baat ki ab wo bhi be-qarar lagi

madad ka hath nahin ek bhi badha tha magar
ajib daur ki bas bhid be-shumar lagi