hamari sair ko gulshan se ku-e-yar behtar tha
nafir-e-bulbulon se nala-ha-e-zar behtar tha

anal-haq ki haqiqat ko jo ho mansur so jaane
ki us ko aasman chadhne se chadhna dar behtar tha

kabhu bimar sun kar wo ayaadat ko to aata tha
hamein apne bhale hone se wo aazar behtar tha

tu apne man ka manka pher zahid warna kya hasil
tujhe is makr ki tasbih se zunnar behtar tha

na kahta main ki aashiq hun tera to kyun wo ram karta
mujhe iqrar ab karne se wo inkar behtar tha

hamari aql mein ghar ki giraftari se 'hatim' ko
kaho diwana phirna kucha o bazar behtar tha