milne ke nahin nishan hamare
kya puchhte ho makan hamare

ehsan se nahin badi bhi khali
dushman hain mehrban hamare

pachhtaoge jaan le ke dekho
nahaq hain ye imtihan hamare

be-misl hain lazzat-e-sukhan mein
sab uth gae ham-zaban hamare

aazad ki justuju abas hai
paoge pate kahan hamare

udti hai khak is zamin se
padte hain qadam jahan hamare

naqa late hain is taraf roz
mohsin hain sarban hamare

hum se bhi kuchh kaho azizo
kya zikr the shab wahan hamare

zahir hai jo guzar rahi hai
kuchh haal nahin nihan hamare

bah gae 'nasim' rang kya kya
ye dida-e-khun-fishan hamare