hamein kya jo gul khile hain ya kali hai muskurai
tu nahin hai jaan-e-jaanan to bahar kyon hai aai

tu ho ham-nashin sanam jab lage farsh arsh jaisa
wo bahisht bhi hai dozakh jahan tu na de dikhai

chuni kis bina pe tu ne hamin muflison ki basti
tujhe barq ye siyasat bata kis ne hai sikhai

tha qusur mere dil ka ya nasib ki thi sazish
mujhe jo bhi chiz bhai kabhi ras wo na aai

tujhe kis tarah se jalwa dikhe ai 'sada' khuda ka
ki hai darmiyan hail tera zauq-e-khud-numai