hamesha kisi imtihan mein raha
raha bhi to kya is jahan mein raha

na main dur tak sath us ke gaya
na wo der tak ham-rahan mein raha

wo dariya pe mujh ko bulata raha
magar main saf-e-tishnagan mein raha

main bujhne laga to bahut der tak
ujala charag-e-ziyan mein raha

qafas yaad aaya parinde ko phir
bahut roz tak aashiyan mein raha

rahi der tak maut se guftugu
main jab halqa-e-raftagan mein raha

na gul koi dil ke shajar par khila
na koi samar shakh-e-jaan mein raha

ye khana hamesha se viran hai
kahan koi dil ke makan mein raha