hamin to hain jo tere sath chalte rahte hain
wagarna log to raste badalte rahte hain

kabhi zamane ka gham hai kabhi tumhaara gham
ghazal sunane ke pahlu nikalte rahte hain

nazar to aate hain ab phul-phal darakhton par
ye aur baat ki hum hath malte rahte hain

ye apni marzi ke malik hain in se kuchh na kaho
purane log hain girte sambhalte rahte hain

ajab udasi mein ab ke guzar rahe hain din
jo kaam aaj ke hain kal pe talte rahte hain

koi charagh sar-e-rahguzar bhi raushan ho
munder par to diye sab ki jalte rahte hain

jhulasti ret pe ek bund hi uchhaal kabhi
ye barishon mein to dariya ubalte rahte hain

na aae wo lab-e-izhaar tak kabhi 'faruq'
ki jazbe dil mein to aksar machalte rahte hain