han kya kaha ki ghair se ulfat bhi kuchh nahin
ye sach agar hai phir mujhe hujjat bhi kuchh nahin

shurb-e-mudam ki mujhe aadat bhi kuchh nahin
aur koi yun pilae to nafrat bhi kuchh nahin

phir tum se aa ke milte bhi hain roz roz wo
ghairon se tum ko rabt-o-mohabbat bhi kuchh nahin

hona jo tha wo ho chuka jati thi jaan gai
aane ki tere ab to zarurat bhi kuchh nahin

dekha jise hasin bas us par phisal pade
sach kahte ho ki aisi tabiat bhi kuchh nahin

naseh na bak fuzul chala ja na munh khula
tu sun le mujh se teri haqiqat bhi kuchh nahin

har roz chhed chhed ke kuchh tazkira bhi hai
aur dukht-e-raz pe shaikh ki niyyat bhi kuchh nahin

nale ko sirf munh se nikalne ki der thi
dekha to aasman ki haqiqat bhi kuchh nahin

teri wajah se parda-e-mashuq fash ho
ai shohrat-e-junun tujhe ghairat bhi kuchh nahin

itna to hai ki tujh se wo kuchh khush nahin 'fahim'
yun tere nam se unhen nafrat bhi kuchh nahin