hangama-e-afat idhar bhi hai udhar bhi

hangama-e-afat idhar bhi hai udhar bhi
barbaadi-e-haalat idhar bhi hai udhar bhi

honton pe tabassum kabhi palkon pe sitare
ye dil ki karamat idhar bhi hai udhar bhi

bechain agar main hun to wo bhi hain pareshan
dar-parda koi baat idhar bhi hai udhar bhi

aashuftagi-e-qalb-o-nazar chhup na sakegi
ek mahshar-e-jazbaat idhar bhi hai udhar bhi

har chand takalluf hai mulaqat mein lekin
arman-e-mulaqat idhar bhi hai udhar bhi

mujrim kise gardaniye kahiye kise masum
ek sail-e-shikayat idhar bhi hai udhar bhi

kyunkar kabhi niklegi koi sulh ki surat
ek talkhi-e-jazbaat idhar bhi hai udhar bhi

un ko bhi koi ranj hai mujh ko bhi koi gham
ek fikr si din raat idhar bhi hai udhar bhi

afsos bhari bazm mein bhi mil nahin sakte
kuchh pas-e-riwayat idhar bhi hai udhar bhi

jo tark-e-talluq pe bhi jati nahin dil se
wo dil ki lagi baat idhar bhi hai udhar bhi

nale bhi sharar-bar hain naghme bhi sharar-bar
ek aatish-e-jazbaat idhar bhi hai udhar bhi

'akhgar' hi ka daman nahin namnak shab-e-gham
aankhon ki ye barsat idhar bhi hai udhar bhi


This is a great chup chup ke milna shayari. Please share if you liked this!!!