hangama hai kya barpa thodi si jo pi li hai
daka to nahin mara chori to nahin ki hai

na-tajraba-kari se waiz ki ye hain baaten
is rang ko kya jaane puchho to kabhi pi hai

us mai se nahin matlab dil jis se hai begana
maqsud hai us mai se dil hi mein jo khinchti hai

wan dil mein ki sadme do yan ji mein ki sab sah lo
un ka bhi ajab dil hai mera bhi ajab ji hai

har zarra chamakta hai anwar-e-ilahi se
har sans ye kahti hai hum hain to khuda bhi hai

suraj mein lage dhabba fitrat ke karishme hain
but hum ko kahen kafir allah ki marzi hai

sach kahte hain shaikh 'akbar' hai taat-e-haq lazim
han tark-e-mai-o-shahid ye un ki buzurgi hai