hazar marhale honge junun se aage bhi
base hain shahar kai sail-e-khun se aage bhi

hum ek din qafas-e-jaan se bahar aae to
pahunch gae falak-e-nilgun se aage bhi

bikhar rahi hain darun-o-barun ki sari haden
lagaen khema darun-o-barun se aage bhi

hamein khabar hui ye shahar sone wala hai
so dekh aae badan ke fusun se aage bhi

kabhi to jhank le diwar-e-qahqaha se udhar
kabhi to dekh le had-e-junun se aage bhi