haqiqaton ka nai rut ki hai irada kya
kahaniyon hi mein le sans shahzada kya

ye rang-zar hai apna paron pe titli ke
dhanak ho khud mein to phulon se istifada kya

mohabbaton mein ye ruswaiyan to hoti hain
sharafaten teri kya mera khanwada kya

agar wo phenk de kashkol apne wirse ka
to is jahan mein kare bhi faqir-zada kya

ziden to shan hua karti hain raison ki
jo chauthi samt na jae wo shahzada kya

ye mere naqsh ye meri sharafaten 'azhar'
ab aur chahiye is se mujhe ziyaada kya