har aks mein jis ka mujhe jalwa nazar aaya
wo aaina-khane mein akela nazar aaya

jab dhyan gaya apni taraf khud pe nazar ki
sahra bhi hamein khak ka zarra nazar aaya

tha mahw-e-safar apni hi takmil ki jaanib
jo naqsh bhi dekha wo adhura nazar aaya

ek roz achanak use dekha tha safar mein
phir dur talak dasht mein dariya nazar aaya

ab shahr mein malum karun kis se ye 'zulfi'
wo mujh ko dikhai na diya ya nazar aaya