har-chand apne aks ka dil dardmand ho
aaine ke labon pe agar zahr-e-khand ho

be-mehr aaftab ka darwaza band ho
aandhi zara thame to ghata sar-buland ho

har lamha us ki madh-sarai na kijiye
mumkin hai aisi baat use na-pasand ho

har gam hauslon ka yahi muddaa raha
gumrah zindagi ki masafat do-chand ho

'akhtar' main ikhtilaf ka qail nahin magar
ahbab ka mizaj hi jab shar-pasand ho