hara shajar na sahi khushk ghas rahne de
zamin ke jism pe koi libas rahne de

kahin na rah mein suraj ka qahr tut pade
tu apni yaad mere aas-pas rahne de

bikhar chuke hain samaat ke talkh shiraaze
ab apne naram labon ki mithas rahne de

wo dekh dah chukin wahm-o-guman ki diwaren
yaqin chikh raha hai qayas rahne de

bada latif andhera hai raushni na jala
urus-e-shab ko abhi khush-libas rahne de

tasawwuraat ke lamhon ki qadr kar pyare
zara si der to khud ko udas rahne de