har ek rishta kahani ho chala hai
hamara khun pani ho chala hai

haqiqat khauf ki surat hai dil mein
ab insan dastani ho chala hai

faza mein gunjti hai shab ki aahat
ufuq bhi zafrani ho chala hai

pare rakkho ye mah-o-sal ka gham
shu’ur ab la-makani ho chala hai

zara suraj jhuka hi tha zamin par
tapish se barf pani ho chala hai

'zafar' donon taraf ke log khush hain
wo shayad darmiyani ho chala hai