har ek shakhs pareshan-o-darba-dar sa lage
ye shahr mujh ko to yaro koi bhanwar sa lage

ab us ke tarz-e-tajahul ko kya kahe koi
wo be-khabar to nahin phir bhi be-khabar sa lage

har ek gham ko khushi ki tarah baratna hai
ye daur wo hai ki jina bhi ek hunar sa lage

nashat-e-sohbat-e-rindan bahut ghanimat hai
ki lamha lamha pur-ashob-o-pur-khatar sa lage

kise khabar hai ki duniya ka hashr kya hoga
kabhi kabhi to mujhe aadmi se dar sa lage

wo tund waqt ki rau hai ki panw tik na saken
har aadmi koi ukhda hua shajar sa lage

jahan-e-nau ke mukammal singar ki khatir
sadi sadi ka zamana bhi mukhtasar sa lage