har guzarta pal naya ek masala deta gaya
har guzarta din nae gham ka pata deta gaya

tapte sahra se tamanna chhanw ki be-sud thi
hum ki chalte hi gae wo aabla deta gaya

dasht-e-furqat jaan-lewa ho gaya us dam mujhe
ek tasawwur aap ka bas hausla deta gaya

mubtala-e-gardish-e-haalat main jab jab hua
mujh ko saya apni rahmat ka khuda deta gaya

bas ye eajaz-e-mohabbat tha ki meri qabr par
sang-dil se sang-dil bhi fatiha deta gaya

wasf-e-fann-e-shairi milta gaya jun jun mujhe
main bhi tha faiyyaz bas leta gaya deta gaya

allah allah naza ka aalam tha lekin wo 'habib'
jate jate mujh ko jine ki dua deta gaya