har lamha karb-o-dard-o-gham-o-iztirab mein
yani meri hayat hai paiham azab mein

ab dil hamara ban gaya khushiyon ka maqbara
hai dafn har khushi isi khana-kharab mein

sadqe hazar jaan se lutf-e-sukun-o-aish
us lutf par jo pa liya hai iztirab mein

gahrai-e-nazar ho to nazzara sahal hai
warna har ek chiz chhupi hai naqab mein

is atomi zamane ki saughat hai yahi
hai ek ek nafas zad-e-qahr-o-itab mein

'maqbul' kya maqam-e-shahid-e-wafa hai dekh
aab-e-hayat pa liya hai zahr-e-nab mein