har-nafas haalat-e-safar mein hun
aur ba-zahir main apne ghar mein hun

aks mera bhi aaine mein hai
main bhi ek chashm-e-mo'atabar mein hun

gili mitti ki tarah main shayad
aaj bhi dast-e-kuza-gar mein hun

aisa lagta hai jaise muddat se
zindagi main teri nazar mein hun

dasht mein bo raha hun shakh-e-gul
aaj tak khwab ke asar mein hun

hech lagti hai 'raaz' har wusat
jaane kis zoam-e-baal-o-par mein hun