har naqsh hawa ho ke bikhar jaega aakhir
'khalid' tera ehsas bhi mar jaega aakhir

mit jaega khwahish ka nishan maut ke hathon
ye sanp bhi sine se utar jaega aakhir

din jis ke liye raat bade karb mein kati
sayon ke taaqub mein guzar jaega aakhir

main khauf hun baitha hun kamin-gah-e-fana mein
tu bach ke meri zad se kidhar jaega aakhir

jo sae ke manind rawan hai mere hamrah
wo shakhs bhi tanha mujhe kar jaega aakhir