har qadam ek khat-e-eajaz mein rakkhe hue hain
wo ram-o-raft kis andaz mein rakkhe hue hain

umr bhar un ke taaqub mein rahe aur khula
khak-paimai ko aaghaz mein rakkhe hue hain

ek rasmi sa taaruf tha mulaqat na thi
aur hum sada use raaz mein rakkhe hue hain

qumri-o-bulbul-o-taus-o-rubab-o-nai-o-chang
sab usi husn ko aawaz mein rakkhe hue hain

ye jo palkon mein dam-e-shab hain chale aae charagh
kisi mahtab ke andaz mein rakkhe hue hain

wo rukh-e-husn-e-samaat hai kisi aur taraf
hum abas dard ko aawaz mein rakkhe hue hain