har sans ek hujum-e-pareshan dhuan ka tha
apna wajud saneha jalte makan ka tha

ek jurm kanch ka hi nahin khun rulane mein
kuchh hath kam-nigahi-e-shisha-garan ka tha

patthar to dushmanon ne bhi phenke hazar bar
jo ghaw lag saka wo faqat dostan ka tha

jis dam par bhi manga zamane ko de diya
har sans koi mal ek uthti dukan ka tha

jo tir aaj dil mein taraazu hua kabhi
chhuta hua wo dosto apni kaman ka tha