har shakhs wafa se hat chuka hai
shishon pe ghubar at chuka hai

dil-ta-ba-dimagh phat chuka hai
ye shahr ka shahr ulat chuka hai

chehron pe damak kahan se aae
suraj ka waqar ghat chuka hai

rishton mein khulus hi kahan tha
pahle bhi ye dudh phat chuka hai

izhaar-e-khulus karne wala
andar se bahut palat chuka hai

itne bhi udas kab the hum log
zahir hai ki dil simat chuka hai

tarikh-e-wafa mein kya milega
aankhon mein jo waqt kat chuka hai

ab samne bhi wo aaen to kya
dil apni taraf palat chuka hai

dil hai ki usi ki nazr 'anjum'
jis dard ka bhaw ghat chuka hai