har taraf ek tirgi si hai batao kya karen
shakl bhi kuchh aadmi si hai batao kya karen

wo gaya hai to kafan ke sath hi phir aaega
maut bhi ab zindagi si hai batao kya karen

jaante hain sab magar kyon bolta koi nahin
har taraf to be-khudi si hai batao kya karen

aadmi wo hai bura aur dil mein us ke hai fareb
par zaban par sadgi si hai batao kya karen

rah-e-ku-e-yar mein bhi samna un se na ho
ek tamanna aakhiri si hai batao kya karen