hasin rukh pe abhi tum naqab rahne do
na kholo band ghazal ki kitab rahne do

uthunga dekhna ek din main aandhiyon ki tarah
abhi karo na sawal-o-jawab rahne do

hum apna farz kisi roz bhul baithen na
hamare kandhon pe kumbe ka dab rahne do

har ek chiz ki mujh mein tamiz hai bhai
tum apne pas azab-o-sawab rahne do

main apni pyas ko sahra-naward kar dunga
mita do sare samundar sarab rahne do

tumhaare waste saya azab hai 'atish'
tum apne sar pe khada aaftab rahne do