ye kya ki chehra naqab-andar-naqab rakkho
yahi hai kafi bacha ke aankhon ki aab rakkho

kaha ye kis ne ki roz-o-shab ka hisab rakkho
ba-nam-e-jaan karb-e-mustaqil ka azab rakkho

saron ke upar se jo tumhaare guzar gai hai
hamare hisse mein dosto wo kitab rakkho

rah-e-tamanna mein jin se raqsan hon mah-o-anjum
tum apni aankhon mein raushni ke wo khwab rakkho

bhatak na jae koi musafir rah-e-talab mein
har ek naqsh-e-qadam mein tum aaftab rakkho

ufuq-ufuq aaftab-e-taza ki zau-fishani
jo ho sake to nazar-nazar inqalab rakkho

mera taaruf hai nam mera kalam mera
tumhein mubarak tum apne sare khitab rakkho