hasin ruton ne mere sath jis ka nam liya
main gir raha tha ki aa kar usi ne tham liya

udasi habs dhuan ishq bekali sahra
sabhi ne mujh se faqat apna apna kaam liya

badal chuke the qawanin-e-jang so main ne
diya bujha ke andhere se intiqam liya

wo ishq ban ke dhadakne laga hai sinon mein
fana ke hath se jis ne baqa ka jam liya

ek iztirab mein apne zamir ka matlab
khuda liya hai kisi ne kisi ne ram liya