hasti ka suragh lag chuka hai
ek aur dimagh lag chuka hai

nafrat ka bij bone walo
dekho yahan bagh lag chuka hai

jo dekhe wo dekhe maskh chehra
aaine pe dagh lag chuka hai

ab dhundo nishan tirgi ka
ab hath charagh lag chuka hai

honton pe hai sabt aks-e-qatil
aankhon se ayagh lag chuka hai

pas-e-namus karte karte
namus pe dagh lag chuka hai

ab jina ziyan hai zindagi ka
dil su-e-faragh lag chuka hai