katta hai azab sher kah kar
milta hai sawab sher kah kar

dekhun kya gul khila rahe ho
lao to jawab sher kah kar

kya sher ke jauhari yahin hain
laya hun janab sher kah kar

nind aaegi is wazife ke baad
dekhunga khwab sher kah kar

koi mera mo'tarif nahin hai
main hun be-tab sher kah kar

kuchh log kharab ho rahe hain
bechaare kharab sher kah kar

guldasta-e-fikr-e-nau yahi hai
khilte hain gulab sher kah kar

tu khush hai ki aaya waqt-e-tanqid
main hun shadab sher kah kar

mera hi bharam badha rahe hain
mere ahbab sher kah kar

'yasir' tu dil-girafta kyon hai
la aur kitab sher kah kar