hausle kyon na dil-e-charkh-e-kuhan ke nikle
misl-e-yusuf na phire jo hain watan ke nikle

mar-mite jo teri ulfat mein wo aazad hue
jite ji band se wo ranj-o-mehan ke nikle

main to khush ho ke ewaz us ke duaen dunga
munh se dushnam jo us ghuncha-dahan ke nikle

galiyan de ke tu kar pyar se baaten ai shokh
hum to shaida tere andaz-e-sukhan ke nikle

sarfaroshon ko khabar do sar-e-maqtal aaen
hath mein tegh liye aaj wo tan ke nikle

sarw-o-shamsad-o-sanobar jo khade hain lab-e-ju
alam-e-sabz hain matam mein hasan ke nikle

ghar se hum apne gunahon ki haya se 'ajiz'
munh chhupae hue ghunghat mein kafan ke nikle