hawa-e-hirs-o-hawas se mafar bhi karna hai
isi darakht ke sae mein ghar bhi karna hai

ana hi dost ana hi harif hai meri
isi se jang isi ko sipar bhi karna hai

chal aa tujhe kisi mahfuz ghar mein pahuncha dun
phir is ke baad mujhe to safar bhi karna hai

yahi nahin ki pahunchna hai aasmanon par
dua-e-wasl tujhe ab asar bhi karna hai

hamein to shama ke donon sire jalane hain
ghazal bhi kahni hai shab ko basar bhi karna hai