hawa ki zad pe diye ko sanbhaal rakkha hai
fasil-e-shab pe ujala bahaal rakkha hai

azal se hain khat-e-mehwar pe ye zaman-o-makan
zamin pe silsila-e-mah-o-sal rakkha hai

sifat-o-zat ko azdad par kiya taqsim
khushi ke sath gham-e-la-zawal rakkha hai

khushi ata ki dilon ko ba-qadr-e-paimana
farogh-e-gham mein bhi ek e'tidal rakkha hai

rumuz khol diye mujh pe aasmanon ke
magar shuur mein dam-e-khayal rakkha hai

usi ne khak se paida kiya hai insan ko
magar har ek ka juda khadd-o-khal rakkha hai

har ek naqsh ko us ne badi mahaarat se
bahut azim magar be-misal rakkha hai

kamal ye hai ki takhliq-e-kaenat hui
magar kamal mein pinhan sawal rakkha hai

yahi hai shan-e-karimi yahi hai husn-e-kamal
har ek shai ka uruj-o-zawal rakkha hai

'saba' hazar ata ki hain neamaten us ne
magar jahan mein asir-e-malal rakkha hai