hawa mahak uthi rang-e-chaman badalne laga
wo mere samne jab pairahan badalne laga

baham hue hain to ab guftugu nahin hoti
bayan-e-haal mein tarz-e-sukhan badalne laga

andhere mein bhi mujhe jagmaga gaya hai koi
bas ek nigah se rang-e-badan badalne laga

zara si der ko barish ruki thi shakhon par
mizaj-e-sosan-o-sarw-o-saman badalne laga

faraaz-e-koh pe bijli kuchh is tarah chamki
libas-e-wadi-o-dasht-o-daman badalne laga