hawa mein zahr hai har rasta ghubar mein hai
darakht phir bhi musafir ke intizar mein hai

na lutf sulh mein koi na chhup ke war mein hai
maza to jang ka dushman se aar-par mein hai

abhi main us ke ghulamon ki hun ghulami mein
ye kaenat abhi mere ikhtiyar mein hai

isi liye hai nigah-e-sitam chaman-bezar
wo rang gul mein nahin hai jo zul-fiqar mein hai

jahan se chaha sitara falak se tod liya
ye wo hunar hai jo bachpan se khaksar mein hai

charagh bechne wale hain sab khasare mein
ki faeda to hawaon ke karobar mein hai