hawa ne baadal se kya kaha hai
ki shahr jangal bana hua hai

jahan meri kashtiyan nahin thin
wahan bhi sailab aa gaya hai

umid aur khauf nachte hain
wo nach-ghar hai makan kya hai

sab us ki baaten ghisi-piti hain
magar wo paikar naya naya hai

wo ja chuka hai par us ka chehra
usi tarah mez par saja hai

sajili almariyon ke pichhe
nokile shishon ka silsila hai

jo sae ki samt ja rahe hain
wo main hun aur ek azhdaha hai

kalaf ke collar pahanne wala
ek aadmi qatl ho raha hai

mera badan jis ko chahta tha
kisi ne wo zahr pi liya hai