hayat aaj giran ho gai sabhi ke liye
taras raha hai har insan zindagi ke liye

nashat-e-zist ki takmil ho nahin sakti
tumhaara dard zaruri hai zindagi ke liye

riya numud-o-numaish kahan ibaadat mein
khulus-e-qalb zaruri hai bandagi ke liye

agar hon qalb mein ehsas ke diye raushan
bahut se raste milte hain shaeri ke liye

sukhanwaran-e-dakan muttafiq hain sab 'akhtar'
‘safi' ghazal ke liye tha ghazal ‘safi' ke liye