kya kuchh mila na hum ko mahrumi-e-nazar se
kuchh daw mustanad se kuchh zakhm mo'atabar se

chhedo na saz dil ka sahmi hui nazar se
badhti hai be-qarari taskin-e-mukhtasar se

kitni badal gai hain insaniyat ki qadren
hum zindagi ke hathon khud zindagi ko tarse

kitni buland himmat hain zindagi ki nazren
takra rahi hain badh kar ab waqt ki nazar se

kaam aai apne 'akhtar' diwangi khud apni
bach bach ke chal rahe hain har ek ki nazar se