hayat-e-ishq ko itna to nur-fam karen
mah-o-nujum adab se jise salam karen

nazar mila ke jo karte hain baat suraj se
wo dubte hue taron se kya kalam karen

abhi to waqt hai tazin-e-mai-kada ke liye
bajae rakhna-gari mil ke koi kaam karen

utho utho ki mashaghil hain aur bhi yaro
fasana-e-gham-e-mazi yahin tamam karen

bulandiyon se pukara gaya hai yun 'ghausi'
ki ahl-e-ishq bhi hasil koi maqam karen