hazin hai bekas-o-ranjur hai dil
mohabbat par magar majbur hai dil

tumhaare nur se mamur hai dil
ajab kya hai ki rashk-e-tur hai dil

tumhaare ishq se masrur hai dil
abhi tak mast hai makhmur hai dil

kiya hai yaad us yaad-e-jahan ne
ilahi kis qadar masrur hai dil

bahut chaha na jaen tere dar par
magar kya kijiye majbur hai dil

faqiri mein use hasil hai shahi
tumhaare ishq par maghrur hai dil

tere jalwe ka hai jis din se maskan
jawab-e-jalwa-gah-e-tur hai dil

do-alam ko bhula den kyun na 'akhtar'
ki us ki yaad se mamur hai dil