hijabaat uth rahe hain darmiyan se
zamin takra na jae aasman se

nikala kis khata par gulsitan se
hamein ye puchhna hai baghban se

wahin jaana hai aae hain jahan se
hain waqif manzil-e-umr-e-rawan se

bahaar aane ki mangi thin duaen
bahaar aai magar bad-tar khizan se

jo hain na-ashna-e-nazm-e-gulshan
unhin ko faede hain gulistan se

abhi murda nahin zauq-e-asiri
qafas ka samna hai aashiyan se

jahan kanton mein uljhe apna daman
bayaban achchha aise gulistan se

ghamon hi se khushi hoti hai paida hai
bahaaren banti hain daur-e-khizan se

sahaara lun agar diwangi ka
guzar jaun had-e-kaun-o-makan se

numayan hai wahi rajat-pasandi
nizam-e-zindagi badla kahan se

lipat jaunga main daman se un ke
sabaq sikha hai khak-e-astan se

bhatakta phir raha hun is tarah main
ki jaise chhut gaya hun karwan se

chaman mein phir banaenge nasheman
hamein zid ho gai hai aasman se

watan dushman inhen kyun kar na samjhen
jinhen hai dushmani urdu zaban se

wahi hai bais-e-taklif 'sajid'
milin thin rahaten jis gulsitan se