hijr jab tai hai to be-kar na hujjat karna
jaane wale ko bahut pyar se rukhsat karna

wo jo bheje the teri mast nigahon ne payam
ek bar aur zara un ki wazahat karna

sab ke hathon mein ye ejaz-e-masihai kahan
ek hi lams ka mansab hai karamat karna

ye to aisa hai ki is rah mein chal padiye
ishq karna to baghair izn-o-ijazat karna

dard uthta bhi rahe aankh se chhalke bhi nahin
sikhte sikhte aata hai shikayat karna

hum ko aadab-e-mohabbat nahin aate 'sima'
hum ko bas tut ke aata hai mohabbat karna