hijr lazim hai to ye hijr nibhae jao
ja rahe ho to koi rabt banae jao

jo bhi is dil pe guzarti hai raqam karte raho
kaise mumkin hai kitabo se bhulae jao

shayad ye tarz kisi ruh mein ghar kar jae
ain mumkin hai kisi dil mein basae jao

ye meri raat bhi ummid lagae hue hai
us ke daman se koi subh lagae jao

guftugu karte agar sath mein hote kuchh der
jate jate mujhe ek sher sunae jao

meri takhliq ko aawaz bana do 'maham'
meri tahrir ki khamoshi mitae jao