honton pe dil ki baat wo lae mere liye
lekin yun na sarab bichhae mere liye

de do ba-sad khulus sitare unhen kai
jugnu liye jo hath mein aae mere liye

tum ko nahin khabar ki mahakne laga hai dil
kaghaz pe us ne phul banae mere liye

main ne bhi zakhm zakhm pe hansne ki than li
kante adu ne jab se bichhae mere liye

ye hijr bhi sawab se kam to nahin 'nawed'
main is ke waste wo kamae mere liye