hua de kar dabe shoalon ko bhadkaya nahin jata
dikha kar jam mai pyason ko tarsaya nahin jata

na le ja dur gulshan se are sayyaad bulbul ko
ki bimar-e-mohabbat par sitam dhaya nahin jata

teri tar-damani ko dekh kar kuchh shak sa hota hai
ki dhabba daman-e-masum par paya nahin jata

hain donon nur ke tukde magar hifz-e-maraatib se
sitaron ko shah-e-khawar se takraya nahin jata

bahaaro hai buri ye baat hum se aashiq-e-gul ko
dikha ke ru-e-gul kanton mein uljhaya nahin jata

na kar nashtar-zani sayyaad sada-lauh bulbul par
na jaane jo tadapna us ko tadpaya nahin jata

'zahir'-e-khasta ye bhi ek usul pas-e-ulfat hai
zaban par kalma-e-shikwa kabhi laya nahin jata