hua kare agar us ko koi gila hoga
zaban khuli hai to phir kuchh to faisla hoga

kabhi kabhi to ye dil mein sawal uthta hai
ki is judai mein kya us ne pa liya hoga

khusha wo raunaq-e-hangama-e-visal ab to
yaqin hi nahin aata ki yun hua hoga

kabhi uthe hi nahin hum talash ko warna
koi to shahr mein apna bhi aashna hoga

nikal pade the yunhi hum to ek din ghar se
kise khabar thi ki yun tujh se samna hoga

phir aaj sham se hi zehn ko faraghat hai
phir aaj shab wahi yaadon ka silsila hoga

teri baraat mein din-bhar yahi khayal raha
ki is khushi ka asar tere dil pe kya hoga

kabhi jo guzre tere shahr se to sochta hun
ki is zamin pe kya kya qadam pada hoga

wo garm garm nafas kaise thaharte honge
ab in shabon ko wo kaise guzarta hoga

wo khoi khoi wafaon ka bhula-bisra git
kabhi to us ke shabistan mein bhi gaya hoga

ye haul-nak khamoshi judai ka aashob
main sochta hun ki yunhi raha to kya hoga

kis aarzu mein uthe kis taraf chale 'anjum'
is aadhi raat mein ab kis ka dar khula hoga