hua sawal ki fariyaad ab nahin aati
diya jawab teri yaad ab nahin aati

zamin-e-sher mein go hal chalae jate hain
magar dimagh ki wo khad ab nahin aati

hai chand logon pe mauquf is liye khilqat
jahan pe batta hai parshad ab nahin aati

ifaqa hai unhen khujli se is liye hum ko
pasand dad ki bedad ab nahin aati

jo ek martaba phans kar nikal gai bulbul
kabhi wo dam mein sayyaad ab nahin aati

qafas ko tod ke tair nikal gaya hoga
sada-e-nala-e-fariyaad ab nahin aati

khizan-rasida hue ghar ba-faiz-e-nas-bandi
bahaar-e-kasrat-e-aulad ab nahin aati

na zauq-e-koh-kani hai na shauq-e-jaan-bazi
sada-e-taisha-e-farhad ab nahin aati

kabhi chale the take kos aaj motor hai
jo ibtida thi kabhi yaad ab nahin aati