hujra-e-zat se bahar to nikal kar dekho
tum kisi dusre paikar mein bhi dhal kar dekho

kya ajab tum ko hi ye ham-safari ras aa jae
do qadam hi sahi tum sath to chal kar dekho

han ye dastar-e-fazilat bhi qaba-e-zar bhi
khud ko dekho to ye poshak badal kar dekho

mausam-e-hijr koi rut hai na kuchh aab-o-hawa
ek taqaza hai ki phir ghar se nikal kar dekho

mat ho jae magar hausla-e-dil ke liye
aakhiri chaal jo baqi hai wo chal kar dekho