hujum-e-dard ka itna badhe asar gum ho
mile wo raat ki jis raat ki sahar gum ho

maza to jab hai ki aawargan-e-shauq ke sath
ghubar ban ke chale aur rahguzar gum ho

hamari tarah kharab-e-safar na ho koi
ilahi yun to kisi ka na rahbar gum ho

chale hain hum bhi charagh-e-nazar jalae hue
ye raushni bhi kahin rah mein agar gum ho

talash-e-dost hai dil ko magar khuda jaane
kahan kahan ye bhatakta phire kidhar gum ho

chaman chaman hain wo nashw-o-numa ke hangame
gulon ko dhundne jae to khud nazar gum ho

sukhan ki jaan hai husn-e-bayan magar 'taban'
na yun ki lafz hi rah jaen fikr-e-tar gum ho