hujum-e-shauq-e-tamanna se tum kahan waqif
mere khayal ki duniya se tum kahan waqif

guzar rahi hai jo mujh par tumhein khabar kya hai
mere mazaq-e-tamanna se tum kahan waqif

tum ek paikar-e-naz-o-ada sahi lekin
niyaz-o-ishq ke sauda se tum kahan waqif

nigah-e-shauq ka arman tum ko kya malum
hamare zauq-e-tamasha se tum kahan waqif

hamare dagh-e-mohabbat ki qadr kya tum ko
charagh-e-sham-e-tamanna se tum kahan waqif

tumhein khabar nahin uftad kya 'ziya' par hai
fareb-khurda-e-duniya se tum kahan waqif