hum aayat-e-qurani us waqt hi padhte hain
ho jaan hatheli par tufan se guzarte hain

kab tab-e-nazara hai bas did ki hasrat hai
mil jao kisi din tum din raat tadapte hain

rahta hai mohabbat ko har waqt hi dhadka sa
mausam ki tarah kahte hain dost badalte hain

ye raat ki rani to ab meri saheli hai
hum hanste hain donon hi donon hi mahakte hain

dete hain mujhe har din tarikh wo aane ki
wadon se mukarte hain kab ishq wo karte hain

socha hai tumhein itna par yaad nahin kitna
shab yun hi guzarti hai hum aahen hi bharte hain

in reshmi yaadon ne uljha ke rakha mujh ko
din mere to aksar ab raaton se ulajhte hain

jin pyar ke lamhon se dil shad sa rahta tha
'dilshad' wahi lamhe ranjur sa karte hain